惜别大笪地

啱啱先知道新陶街要结业，依家又话宝华路大笪地呢个月底要执笠，你话一班男士同师奶系几咁失落呢？喺广州，类似嘅平民集市已经越来越少，呢度改造嗰度又话要收地，实在可惜。

大笪地系香港以前嘅一种夜市，有“平民夜总会”之称。喺粤语里边，大笪地有“一大块空地”嘅意思。当时香港最出名嘅大笪地喺上环，入边既有跳蚤市场又有大排档，有啲似今日嘅庙街。虽然上环大笪地已经冇咗，但系香港其他地方仲有类似嘅市场，俾啲小贩摆档做生意。

广州大笪地系香港嘅“引进版”，到今时今日已经有廿几年历史。佢兴起嘅时候，广州都仲未有咁多MALL咁多商圈，大家平日逛得最多嘅就系东百、新大新、北京路又或者西湖夜市。喺西关呢边，街坊帮衬得最多嘅就系大笪地上边嘅走鬼。后来地铁开通，长寿路地铁站口嘅一笪地方搭成一个半露天嘅市场，一班走鬼就将个档口安置喺呢度，成为街坊口耳相传嘅广州大笪地。

广州好多师奶得闲都中意去逛下大笪地。就算唔买嘢，随便行下都几有意思。而且呢度交通方便，又近上下九，所以节假日呢度总系人头涌涌。啲档口挂晒大字报开大个高音喇叭，呢啲景象，喺CBD里边嘅商场又点会睇得到呢？

大笪地好快就要消失，都唔奢望佢可以另地重建。就算重建，可能都冇咗嗰种平民市场嘅味道。趁住周末，大家去行返两转啦。