西关大屋唔会潮

◎阿六 律师

新闻讲：近两天，广州连续出现潮湿天气，不少市民都在抱怨“家里到处都潮潮的”。

阿六讲：广州气候季节特点，就系每年哩个时候开始“回南”，潮湿天气严重嗰时，无论你间屋系豪装豪宅，还系瓦面平房，都难免出现天花滴水、墙壁“出汗”、地下湿滑。

咁有冇一种屋系唔会潮湿嘅呢？有，就系我哋广府文化嘅代表性建筑——西关大屋。

大家都知道，西关大屋有著名嘅“三件头”：矮脚吊扇门、趟栊、硬木大门，哩个讲嘅外观同用途。而喺建材上，西关大屋同样有“三件宝”：青砖、红阶砖、樟木（或红木）。

正宗嘅西关大屋墙壁都系用青砖砌嘅，哩种墙虽然冇批荡，但由于青砖系用粘土做嘅，具有密度强、吸水性好嘅特点，所以可以挡住同吸收湿气。

宜家市面上好多防潮用品都系用樟木做材料，其实，哩个“桥”就系向西关大屋“偷”嘅，因为西关大屋嘅趟栊、大门同天花横梁就系用樟木做嘅，目的就系防潮。

潮湿天气，喺屋企就最怕地面迉，所以，当年嘅西关大屋嘅“建筑师”，就用一种红色大阶砖铺嚟地面。哩种红阶砖最大特点就系质地比较疏，吸水力超强，只要上面有水，唔使一分钟就自动索干。

由于用咗哩啲“防潮建材”，再加上整体结构上，系运用咗敞厅、天井、窄巷嘅布置嚟扯穿堂风，所以，西关大屋一年四季都系干爽透气。

西关大屋所用嘅建材同设计未必都适合宜家嘅建筑，但我哋祖先嘅“防潮智慧”值得钦敬。