“花艇”嘅是与非

新闻讲：近日，有市民就首届“广州水上花市”将“再现花船巡游”提出质疑，认为“花船”其实是“花艇”的意思，而“花艇”在旧社会是“水上妓院”的代称。

阿六讲：睇一啲粤语残片时，经常听到剧中嘅坏人恐吓良家妇女时会讲一句“再唔听话就卖你落花艇”。广州以前嘅“花艇”的确唔系卖花嘅艇。

“花艇”最早出现喺广州嘅清代。当时喺珠江西岸荔枝湾一带停咗好多水上人家船只，船家都系一啲被陆地人睇唔起嘅疍家人。为咗生计，疍家人将艇装饰到花花绿绿，做成水上流动妓院。

广州人啲语言有个特点，就系当讲到唔好嘅嘢时就用“代称”，使哩样嘢听起嚟会好听啲，比如：人去世，就叫“过身”，所以，当时嘅人将做妓院嘅船只叫做“花艇”亦系情理之中。

“花艇”上“从业”嘅女人大多系疍家妹，粤语讲到嘅“花娘花艇”中嘅“娘”就系指哩啲过住“对人欢笑背人垂泪”嘅苦命女人。

由于清代嘅广州系国内惟一嘅通商口岸，来往嘅中外生意人特别多，亦使到“花艇”行业状大起身，据资料记载，珠江两岸最多嗰时曾云集几千只“花艇”，场面非常壮观。

广州解放后“花艇”就喺现实中消失咗，但“花艇”仍然俾文化界作为一种历史题材搬上屏幕或舞台，如刘德华拍嘅第一部电视剧《花艇小英雄》，本地大型话剧《十三行商人》，里面嘅人物同剧情都取材自“花艇”。

对于宜家叫“再现花艇”好唔好，见仁见智嘞。