课本上嘅歌仔

2012年09月03日 07:06
来源：信息时报

字号:T|T

0人参与 0条主评论 0条评论 0条总评论打印转发

白话广州　◎闻歌媒体人

女女今日开始返小学，前两日去学校领课本，睇到佢嘅课本里边有本《广州音乐》。打开翻咗下，觉得好唔错。原来，广州从小学一年级就开始有乡土音乐教材，俾小朋友从细开始学习地方音乐，对弘扬广州本土文化应该系一件好事。

其实广州啲细路，接触白话童谣嘅机会相当之多。《氹氹转，菊花园》、《排排坐》、《鸡公仔》之类嘅歌仔，周街都可以听到。不过，我发现课本里边选编嘅童谣，同我哋耳熟能详嘅歌曲，其实有少少唔一样。比如《鸡公仔》嘅后一段，系“唔系爹娘教导我，自己精乖冇奈何”，相信系最原始嘅版本，保留咗原汁原味。可见，如今流行嘅粤语童谣，唔少都经过改良，加入咗现代元素。课本就注重音乐嘅原本面貌，对于细路嘅知识应该系一个有益嘅补充。

广州嘅童谣，好多都历经岁月嘅洗礼，从上百年前嘅农业社会一直流传到今时今日。佢哋唱嘅，大多数系乡下嘅生活场景，比如养鸡仔、担柴、烧火、打渔、养猪。对家下广州啲细路，真系恍如隔世。唱歌仔，可以俾佢哋了解我哋岭南地区祖先嘅生活，令佢哋知道，劳动原来亦有咁大嘅乐趣，可以创造音乐，创造美。

所以，弘扬乡土文化，其实系一项系统工程。教细路唱白话童谣嘅同时，亦要向佢哋介绍乡土地理、乡土历史，知道每首好听嘅歌仔背后，其实都系一段有趣有味嘅古仔。咁样，先可以令到佢哋对自己生活嘅城市加深了解，真正对乡土文化感兴趣。