艰难嘅翻生路

2012年08月29日 07:04
来源：信息时报

字号:T|T

0人参与 0条主评论 0条评论 0条总评论打印转发

◎陈嫚职员

长堤大马路嘅岭南大舞台即係岭南大戏院，2010年复业之后，依家又执笠了，保安话戏院依家正进行内部调整，几时重开都未知。一代古董戏院，竟然三番四次翻生失败，真係令人唏嘘。

岭南大戏院今年已有108岁了，上世纪20年代改建之后繁华无比，戏班们只要喺呢度演出过，即刻身价暴涨。粤剧名伶马师曾、薛觉先以及京剧大师梅兰芳亦曾经喺呢度表演过。改革开放之后，岭南大戏院嘅生意越来越差，终于喺2002年执咗笠。2005年，岭南大戏院以“魔立方国际商旅剧场”嘅身份重新开张，因为门票太贵，未到两年时间就又执笠。跟住，佢于2010年摇身变成依家嘅平安大舞台重新开门，亦曾火爆一时，点知先过咗1年几时间，就又关门了。

我係80后，未赶上岭南大戏院嘅繁荣时期，细个嗰阵都係去永汉电影院、平安戏院睇戏，只偶尔听长辈讲起岭南大戏院曾经几风光。呢几年，频频传出古董戏院翻新嘅消息，不过多数都逃唔甩消寂嘅命运，比如平安大戏院就喺前一排俾偷偷拆咗，当时好多网友齐齐缅怀，依家又传出岭南大戏院唔好嘅消息，相信有好多人都同我一样心罨。

据报道，平安大舞台依家嘅东家一次性买咗30年嘅经营权，依家先过咗未够两年时间就停业。据讲，好多客人都反映平安大舞台里面消费贵，又冇乜嘢特色，周边停车又难。咁多问题一时半刻肯定难以解决，真係难以想象，呢度以后会变成点样？