南音不衰

广东音乐曲艺团透露，9月3号会喺中山纪念堂举办“粤港澳南音名家汇”，届时，中意南音嘅街坊又可以一饱耳福了。

好多外地朋友都知道“粤剧”，但就未必知道“南音”。其实，呢两个概念系“从属”关系。广东南音系一个曲种，用粤语演出，方式以“说唱”为主。而粤剧就系流行于广府地区嘅传统戏剧，唔单止包含南音，仲有粤讴、木鱼、龙舟等曲种。

而家嘅广州街坊，最熟悉嘅应该系“地水南音”，即是通常讲嘅“盲佬唱南音”。因为喺旧时，盲人嘅谋生手段好有限，除咗唱曲，好多人会以占卜谋生。所以，街坊亦习惯以卦名“地水”去称呼佢哋，并将由盲人演绎嘅，常用月琴、秦琴、二胡来演奏嘅南音称之为“地水南音”。

更早嘅时候，广府地区仲流传所谓嘅“老举南音”。老举，系广州街坊对旧社会妓女嘅别称。佢哋出局去酒楼陪客时，经常会演唱南音，乐器以琵琶为主。而演出风格，因为系“助兴”嘅关系，亦唔似“地水南音”咁凄凉，相反会不乏得意、抵死甚至格调唔高嘅曲目，因此自成一格。不过，呢种南音喺废娼之后就逐渐失传。

如果外地朋友想了解南音，可以去睇吓张国荣、梅艳芳演出嘅《胭脂扣》，里面嘅《客途秋恨》就系一首典型嘅地水南音，唱得凄凉又悠扬，当年红极一时。