珍妃与广州

《羊城晚报》副刊近日推荐咗一本讲晚清嘅书，里面提到珍妃同广州嘅关系：因伯父长善曾任广州将军，珍妃从小随伯父住喺广州，见过少少世面。因此，入宫之后，带住广州潮流印记嘅珍妃，亦迅速获得光绪皇帝喜爱，成为维新道路上志同道合嘅伴侣。

只不过，珍妃姓他他拉氏，摆明就系发源于白山黑水嘅满族人，点解会千里迢迢来到广州呢？呢样嘢，要从满清驻军讲起。

话说，康熙平定三藩，开始喺广州设八旗驻防，包括满汉八旗在内，当时都驻守喺惠福路、人民路、解放路一带。八旗驻军，好多人一驻就唔走了，所以来落脚嘅唔单止有兵，仲有大批随军家属，例如小时珍妃。佢哋嘅衣食住行自成一格，逐渐为广州增添好多满清特色。例如满洲窗，相传就系满洲执政官从欧洲带过来嘅，结合本地建筑特色，变成“广式满洲窗”。

而家，满洲窗就拆少见少咯。不过，拆唔去嘅，仲有好多路名，例如过去著名嘅电器一条街，将军东，旧时就系将军署所在地，珍妃分分钟住过嗰度。再比如北校场，过去系跑马训练场，亦系满人沙场秋点兵嘅重地。

如今，广州依然有好多世居满人，对广州嘅了解比我哋仲要深。佢哋彻底本地化，但好多人依然保留满族习惯，包下饽饽，过下颁金节，成为广州历史最鲜活嘅见证。