怀念儿时星空

2012年07月18日 07:03
来源：信息时报

字号:T|T

0人参与 0条主评论 0条评论 0条总评论打印转发

呢几年，我养成咗一个习惯，每逢夜晚外出，一定会抬头傻望一阵，睇乜嘢呢？睇星星。广州市区都睇得到星星？可以，不过唔係日日都睇得到。我知道喺市区睇星星好傻好天真，但就係唔忿气，点解喺自己屋企睇星星都咁奢侈呢？

前日，有报道话，自从2009年开展蓝天观测以来，广州有八成时间都可以睇得到蓝天，即係话，平均每个月只有一个星期係睇唔到蓝天嘅。呢个数据引起一众市民嘅质疑——点解有咁高嘅蓝天出现率，我哋仲觉得市区嘅天空大多时候都係蒙查查嘅呢？而每一次蓝天出现嘅时候，好似都係台风或者暴雨啱啱过去之时。

记得二十年前，广州嘅天空又蓝又干净，每到夏天，家家户户食完晚餐都会出来透气，我同我妹就会喺天台铺一张凉席，瞓喺凉席上数星星、倾葛，嗰阵时嘅星星好多好闪好梦幻，当时点都惗唔到。二十年之后，睇星星会变成一件奢侈嘅事。话又讲返，嗰阵嘅生活水平都冇依家高，边似得依家日日惗爆头食乜嘢着乜嘢，有得食有得着就唔错了，真所谓有得必有失。如果你问我，可以选择嘅话，你宁愿过返以前嘅生活，定係选择依家？我真係答唔出，我既唔舍得放弃依家富足嘅生活，亦想呼吸以前新鲜嘅空气、欣赏美丽嘅星空。

到几时，我先至可以喺屋企嘅阳台，睇星空呢？我唔指望能睇返细个嗰阵时嘅星空，只希望广州嘅空气可以维持亚运时期嘅程度就好了。